ஜூலை 6 நான்+வானொலி

2001 ஆம் ஆண்டு இதே ஜூலை மாதம் 6 ஆம் நாள் எனது வாழ்நாளில் மிகவும் முக்கியமான நாள். ஆம் அன்றுதான் கல்லூரியில் நடைபெற்ற கண்காட்சி நிகழ்வொன்றில் செய்த வானவில் மாணவர் ஒலிபரப்பு சேவையினூடாக நான் என்னை ஒரு ஒலிபரப்பாளனாக  அறிமுகப்படுத்தினேன். 

மேலும் 2008 ஆம் ஆண்டும் இதே ஜூலை 6 ஆம் நாள் எனக்கு முக்கியமான நாள்தான். ஆம் அந்த நாளில்தான் நான் தாளம் fm இணைய வானொலியில் அறிவிப்பாளராக தெரிவு செய்யப்பட்டேன். அந்த வகையில் தாளம் fm இணைய வானொலியில் 2008 ஜூலை 06 ஆம் நாள் தொடக்கம் 2009 நவம்பர் 03 ஆம் திகதி வரை ஒரு அறிவிப்பளனாகவும், அதன் பின்னர் 2009 நவம்பர் 23 ஆம் திகதி முதல் 2010 ஆம் ஆண்டு அக்டோபர் 1 ஆம் திகதி வரை டான் தமிழ் ஒளித் தொலைக்காட்சி, டான் தமிழ் ஒலி செய்மதி வானொலி என்பவற்றில் ஓளி,ஒலிபரப்பாளனாகவும்  பணி புரிந்துவிட்டு அதன் பின்னர் எனது சொந்த ஊரான முல்லைத்தீவு மாவட்டத்தில் Vanavil Media Networks என்னும் நிறுவனத்தை  நல்ல உள்ளங்களின் உயரிய அர்ப்பணிப்புடன் உருவாக்கி  அதன் ஊடாக www.sanjeevaoli.com என்னும் இணையம் வழியே சஞ்ஜீவ ஒலி வானொலியில்  (இப்போது அந்த வானொலியை தமிழருவி வானொலி என்னும் நாமத்துடன் இயக்குகின்றோம்) இயக்குனராகவும், அறிவிப்பாளராகவும் இன்றுவரை வானொலிப் பயணத்தை  தொடர்கின்றேன். 

2001 ஜூலை 06 ஆம் திகதி முதல் இன்றுவரை வானொலித்துறை தொடர்பில் பல்வேறு புதிய, புதிய அனுபவங்களை பெற முடிந்ததுடன் எனது சொந்த மண்ணில் வானொலித் துறையின் மீது ஆர்வமாய் இருந்தவர்களுக்கு என்னால் இயன்ற, எனக்கு தெரிந்த விடயங்களை சொல்லிக் கொடுத்த திருப்தியும் உண்டு. மேலும்  சஞ்ஜீவ ஒலி ( தமிழருவி ) வானொலியினூடாக  இதுவரை 20 இற்கும் அதிகமானவர்கள் அறிவிப்பாளர் என்னும் அடையாளத்தை பெற்றுள்ளார்கள் என்பதுடன் இப்போது இலங்கையின் வெவேறு பாகங்களிலுமிருந்து நமது வானொலியில் அறிவிப்பாளர்களாக பணிபுரிய பலரும் முல்லைத்தீவை நோக்கி வருகை தரவுள்ளமை பெருமை கொள்ள செய்கின்றது. 

அந்தவகையில் நான் வானொலித் துறைக்குள் காலடி பதித்து 11 ஆண்டுகள் பூர்த்தியாகும் நாளில் கடந்த 2011 ஆம் ஆண்டு அக்டோபர் மாதம் 09 ஆம் திகதி இலங்கையிலிருந்து வெளிவரும் மித்திரன் வார மலரில் பிரசுரமான எனது நேர்காணலினை   எனது வலைப்பூவில் பதிகின்றேன்.

கலைத்துறைக்கான களங்கள் உருவாகுவது ஆரோக்கியமானதே!

 தென்னகத்தை போன்று கலைத்துறைக்கான களங்கள் எமக்கில்லை. ஊடகங்கள் மட்டுமே எமக்கிருக்கும் உயரிய களங்களாகும். இதில் வானொலி, தொலைக்காட்சி என்பன மட்டுமே தமிழர்களுக்குள்ள சிறப்பான இடங்களாகும். எனவே இத்துறையில் புதிய சேவைகள் ஆரம்பமாவது வரவேற்க வேண்டியதே.

இவ்வாறு தனது ஆதங்கத்தை வெளிப்படுத்தினார் சஞ்ஜீவ ஒலி இணைய வானொலியின் பணிப்பாளர் மயில்வாகனம் செந்தூரன். மித்திரன் கலைஞர் சந்திப்பிற்காக அவரை நேர்கண்ட போது...

முதலில் உங்களை பற்றி சற்றுக் கூற முடியுமா?

நான் பிறந்து வளர்ந்தது எல்லாம் முல்லைத்தீவில்தான். தண்ணீரூற்று சீ.சீ.தமிழ்க் கலவன் பாடசாலை, முள்ளியவளை அரசினர் தமிழ்க் கலவன் பாடசாலை(இப்போது முள்ளியவளை தமிழ் வித்தியாலயம் என்று பெயர் மாற்றப்பட்டுள்ளது) ஆகியவற்றில் ஆரம்பக் கல்வியையும், முள்ளியவளை வித்தியானந்தக் கல்லூரியில் உயர் கல்வியையும் கற்றேன். சிறிய வயது முதல் ஊடகத் துறையில் அதிலும் குறிப்பாக அறிவிப்புத் துறையில் அதிக நாட்டமும், ஆர்வமும் இருந்தது. எனவே எனது எதிர்கால இலக்காக அறிவிப்புத் துறையை விரிவுபடுத்திக் கொண்டேன்.

உங்களது வானொலிப் பிரவேசம் எவ்வாறு அமைந்தது?

கடந்த 2001 ஆம் ஆண்டு ஜூலை மாதம் 06 ஆம் திகதி கல்லூரியில் ஒரு கண்காட்சி நிகழ்வு ஏற்பாடு செய்யப்பட்டிருந்தது. அந்த நிகழ்வில் வானொலியின் பால் அதிகம் ஈர்க்கப்பட்ட நானும், எனது நண்பர்களும் சேர்ந்து வானவில் மாணவர் ஒலிபரப்பு சேவை என்னும் பெயரில் ஒரு வானொலியை  ஒலிபரப்பினோம். 

நவீன தொலைத்தொடர்பு வசதிகள் எதுவும் இல்லாது இருந்த நமது பிரதேசத்தில் தொலை பேசி மூலம் எப்படி ஒரு வானொலியோடு இணையலாம் என்பதை விளக்குவதற்காக ஒரு தொலைபேசிக் கூடத்தையும் செய்தோம். 

சிறிய வயதில் நாம் செய்த இந்த முயற்சி பெரிய வெற்றியை தேடித்தந்தது. அதிபர், ஆசிரியர்கள், பெரியவர்கள், நண்பர்கள் என எல்லோரும் எம்மை பாராட்டினார்கள். அன்றைய அந்த ஒலிபரப்பில்தான் நான் எனது அறிவிப்பு திறனை வெளிப்படுத்தினேன். 

இவவாறன ஒரு ஆர்வம், திறன் உருவாக 1999 ஆம் ஆண்டு காலப்பகுதியில் சக்தி fm வானொலியில் லோஷன் அண்ணாவும், எழில்வேந்தன் அண்ணாவும் சேர்ந்து செய்த நிகழ்ச்சிகளே காரணமாய் அமைந்தன . 

எனவே அவர்கள் இருவரும்தான் வானொலித் துறையில் எனது முதலாவது குருநாதர்கள். அதன் பின்னர் இலங்கை  வெகுஜன ஊடக நிறுவனத்தின் (MMIC ) இயக்குனர் திருS.K. ரமேஷ் , தாளம் fm வானொலியின் பணிப்பாளர் திரு R . தர்ஷன் ஆகியோர் வானொலித் துறை பற்றி நேரடியான பயிற்சிகளையும், நுட்பங்களையும் கற்றுத் தந்தார்கள். 

சில பயிற்சி பட்டறைகளில் மூத்த அறிவிப்பாளர்களின் ஆலோசனைகளும் கிடைத்தன. 

இவ்வாறாக ஆரம்பித்த ஊடகப்பயணம் தாளம் fm வானொலியில் அறிவிப்பாளராகவும், டான் தமிழ் ஒளித் தொலைக் காட்சியில் நிகழ்ச்சித்தொகுப்பாளராகவும் தொடர்ந்து இப்போது எனது சொந்த மண்ணிலிருந்து இயக்குனராகவும், அறிவிப்பாளராகவும் தொடர்கின்றது.

அறிவிப்புத் துறை தவிர்ந்த வேறெந்த துறைகளில் உங்களுக்கு ஆர்வம் உள்ளது?

எழுத்துத் துறையில் ஆர்வம் உண்டு. இதன்படி கடந்த 2009 ஆம் ஆண்டு மே மாதம் தொடக்கம் www.senthuva.blogspot.com என்னும் வலைப்பூவில் எனது எண்ணங்களை பதிவு செய்து வருகின்றேன். 

இது தவிர இலத்திரனியல், தொழில்நுட்ப ரீதியான ஆர்வமும் உண்டு. சிறிய வயதில் துடுப்பாட்டம், உதைபந்தாட்டம் போன்றவற்றிலும் எனது தடங்களை பதித்துள்ளேன்.

உங்களது இணைய வானொலிச் சேவையின் நோக்கம் எவ்வாறானது என்பதை விளக்க முடியுமா?

உண்மையில் நமது பிரதேசத்தில் என்னைப் போன்று ஊடகத் துறையில் ஆர்வமுள்ளவர்கள் அதிகளவில் உள்ளனர். எனினும் நமது இன்றைய பொருளாதார நிலைமையில் கொழும்பு போன்ற நகருக்கு சென்று அங்கு ஊடகப்பயிற்சி பெற்று அறிவிப்பாளராக வானொலியில் இணைந்து பின்னர் அங்கு பயிற்சி அறிவிப்பாளர் என்ற நிலையிலிருந்து அறிவிப்பாளர் என்ற நிலையை அடைவதென்பது மிகவும் கடினமானதாகும். 

எனவே இவ்வாறான அறிவிப்புத் துறையில் ஆர்வம் உள்ளவர்களுக்கு ஓர் அடிப்படை பயிற்சி களமாகவும், வன்னி மண்ணின் ஊடக அடையாளமாகவும் வன்னி fm சஞ்ஜீவ ஒலியை (தமிழருவி வானொலி) பண்பலையில் மேம்படுத்த வேண்டும் என்பதே நமது பிரதான நோக்கமாகும். 

இதனை விட புதிய புதிய குரல்களை வானொலியில் அறிமுகம் செய்து ஏராளமான அறிவிப்பாளர்களை  உருவாக்க வேண்டும். 

நம்மால் இயன்றவரை நமது பிரதேசத்தில் வாழும் சிறுவர்களின் கல்வி நடவடிக்கைகளுக்கு உதவ வேண்டும். இதன் முதற் கட்டமாக கடந்த ஆகஸ்ட் மாதம் 22 ஆம் திகதி ஒரு தொகுதி மாணவர்களுக்கு கற்றல் உபகரணங்களை பகிர்ந்தளித்தோம். 

இதனை விட கலைத்துறையிலும் நமது பங்களிப்புக்கள் அதிகமானதாக இருக்க வேண்டுமென எதிர்பார்க்கின்றோம். உதாரணமாக இப்போது நமது முல்லைத்தீவு மாவட்டத்தில் இசைக் கச்சேரிகளை செய்யக் கூடிய தனித்துவமான இசைக் குழு ஒன்று இல்லை. எனவே அதனை உருவாக்கும் முயற்சியிலும் ஈடுபடுள்ளோம். 

உங்கள் இணைய வானொலிக்கு ரசிகர்களின் வரவேற்பு எவ்வாறுள்ளது?

பொதுவாக இணைய வானொலிகள் இளைய தலை முறையினரை குறிவைத்தே நிகழ்ச்சிகளை படைக்கும். இதற்கு நாம் மட்டும் விதிவிலக்கல்ல. எனினும் நமது வானொலியை இளைய தலைமுறையினரை தாண்டியும் ஏராளமானவர்கள் கேட்கிறார்கள். 

உலகிலுள்ள பல்வேறு நாடுகளிலிருந்தும் நம்முடன் நேயர்கள் தொடர்புகொள்கிறார்கள். மேலும் உள்நாட்டிலும் இப்போது இணைய பாவனை அதிகரித்துள்ளது. யாழ்ப்பாணம், கொழும்பு, வவுனியா, மன்னார், கண்டி, மட்டக்களப்பு, திருகோணமலை, அம்பாறை, கிளிநொச்சி என்று இலங்கையின் பல பாகங்களிலிருந்தும் ஏராளமான உறவுகள் நமது வானொலியை செவிமடுப்பதுடன் உலக வாழ் தமிழர்களும் நம்முடன் இணைந்துள்ளார்கள். 

யுத்தத்தின் கொடிய பிடியில் சிக்கிய முல்லைத்தீவிலிருந்து ஒரு வானொலிச் சேவை என்பது உண்மையிலையே எல்லோருக்கும் மகிழ்ச்சி தரும் என்பதில் சந்தேகம் இல்லை. மேலும் நமது வானொலியானது கடல் கடந்து கண்டம் கடந்து உலகெங்கும்  பரந்து  வாழும் தமிழ் பேசும் நெஞ்சங்களுக்கு ஓர் உறவுப்பாலம் என்பதால் நம்மை ஊக்குவிக்கும் வகையிலான கருத்துக்களும், தவறுகளை திருத்தி கட்டமைக்க கூடிய வகையிலான கருத்துக்களும் கிடைப்பது ஆரோக்கியமானதே.

வானொலி அலைவரிசைகள் இணைய வானொலிகள் அதிகரித்துள்ள நிலையில் தமிழ் மொழியின் நிலைமை என்ன?

உண்மையில் தனியார் வானொலிகளின் வருகையின் பின்னர் வானொலி மொழி நடையில் மாற்றங்கள் வந்திருப்பதை மறுப்பதற்கில்லை. இந்த மாற்றங்கள் நேயர்களுக்கும் வானொலிக்கும் இடையில் மிகுந்த நெருக்கத்தை ஏற்படுத்தியுள்ளன. 

இருந்த போதிலும் சாதாரணமாக பேச்சு வழக்கில் உள்ள சொற்பதங்களை வானொலியில் கேட்கும் போது கொஞ்சம் நெருடலாகத்தான் இருக்கின்றது. காரணம் வானொலியின் உயர்ந்த தரத்தை இது பாதிக்கின்றது என்பதாகும். பிரதேச வழக்குகளும் அவ்வப்போது தலை தூக்குவதும் தவிர்க்கப்படுவது நல்லது என நினைக்கின்றேன். 

இவற்றிற்கப்பால் ஒவ்வொரு சொற்களையும் சரியான மாத்திரை பெருமானத்துடன் உச்சரிப்பதில் கவனம் செலுத்தினால் சாலச் சிறந்தது. இப்போது நிறைய வானொலிகள் உருவாகுவது நல்லது என்றே நினைக்கிறேன். காரணம் அதிகமானவர்களுக்கு அது களமாக அமையும்.  இந்தியாவை பொறுத்தவரையில் சினிமாத் துறையானது கலைஞர்களுக்கு களம் கொடுக்கிறது. எனினும் இலங்கையில் கலைஞர்களுக்கான களங்கள் குறைவு. எனவே இப்போதைக்கு ஊடகங்கள் மட்டுமே நமக்கு பெரிய களங்கள் என்பதால் புதிய ஊடகங்கள், வானொலிகள் என்பவற்றை வரவேற்போம்.

இறுதியாக அறிவிப்பு துறைக்கு வர விரும்பும் நமது வாசகர்களுக்கு நீங்கள் கூற விரும்புவது?

இந்த துறைக்கு வருவதற்கு முன்னர் இந்த துறை சார்ந்தவர்களுடன் தொடர்பு கொண்டு ஆலோசனைகளை பெற்றுக்கொள்ளுங்கள். அதிக அர்ப்பணிப்பும், ஆர்வமும், திறைமையும் இருந்தால் மட்டுமே இந்த துறை இனிக்கும். அறிவிப்பாளராக பிரபலமாவது ஒன்றும் சாதாரணமான விடயமல்ல. அவாறு பிரபலமானாலும் அந்த பிரபலத்தை தக்க வைப்பதென்பது சுலபமானதல்ல. மேலும் அறிவிப்புத் துறை என்பது ஒன்றும் மிமிக்கிரி கலை அல்ல. நமது தனித்துவம் வெளிப்படும் வகையில் பிரகாசிக்க வேண்டும். இந்த துறைக்குள் வர விரும்புபவர்கள் வெற்றி பெற வேண்டுமென பிரார்த்திக்கின்றேன். 

(மித்திரன் வார மலரில் மேற்படி நேர்காணல் வெளிவருவதற்கு காரணமாய் இருந்தவர் நமது வானொலியில் முன்பு அலுவலக முகாமையாளராகவும், அறிவிப்பாளராகவும் பணி புரிந்த ராமசாமி ரமேஷ் எனவே இந்த இடத்தில் அவருக்கு நன்றி சொல்வதும் பொருத்தமாய் இருக்கும் என நம்புகிறேன்.)

இந்த பதினொரு வருட வானொலிப் பயணத்தில் பலரும் பல்வேறு வழிகளிலும் உதவியுள்ளார்கள். எல்லோருக்கும் என்றும் நன்றியுடையவனாக இருப்பேன். நன்றி..நன்றி..நன்றி...

ஐரோப்பியக் கிண்ணம் 2012 ஸ்பெயின் வசம்....

பெரிதும் எதிர்பார்க்கப்பட்ட பதின் நான்காவது ஐரோப்பியக் கிண்ண  கால்ப்பந்தாட்ட இறுதிப் போட்டியில் இத்தாலி மற்றும் ஸ்பெயின் ஆகிய அணிகள் மோதின. உக்ரைன் நாட்டின் தலைநகரான கிவ் இல் ஒலிம்பிக் மைதானத்தில் நடைபெற்ற இந்த போட்டியில் ஆரம்பம் முதலே ஸ்பெயின் அணியின் ஆதிக்கம் அதிகமாகவே இருந்தது. அந்த வகையில் போட்டி ஆரம்பித்து 14 ஆவது நிமிடத்தில் ஸ்பெயின் அணியின் David Silva முதலாவது கோலை போட்டார்.  இத்தாலி அணிக்கு கோல் போடும் வாய்ப்புக்கள் ஓரளவுக்கு இருந்தும் அவர்கள் அதனை தவற விட்டனர். தொடர்ந்து ஆதிக்கம் செலுத்திய ஸ்பெயின் அணி சார்பாக இடைவேளைக்கு நான்கு நிமிடங்களுக்கு முன்னதாக அதாவது போட்டியின் 41 ஆவது நிமிடத்தில் Jordia Alba ஸ்பெயின் அணி சார்பில் இரண்டாவது கோலை போட்டார். அந்த வகையில் இடைவேளையின் போது ஸ்பெயின் அணி 2 - 0 என்கின்றகணக்கில் முன்னிலை வகித்தது.

  இடைவேளையின் பின்னர் இத்தாலி அணிக்கு கோல் போடுவதற்கான வாய்ப்புக்கள் அதிகமாகவே இருந்தது. மேலும் இடைவேளையின் பின்னர் இத்தாலி அணியின் ஆதிக்கம் இடைவேளைக்கு முன்பை விட அதிகமாக இருந்ததையும் காண முடிந்தது. எனினும் ஸ்பெயின் அணியின் கோல் காப்பாளரின் சாமர்த்தியத்தால் இத்தாலி அணியால் கோல் எதனையும் போட முடியவில்லை. ஸ்பெயின் அணியின் ஆதிக்கம் இடைவேளையின் பின்னர் மிகவும் குறைவாக இருந்த போதிலும் போட்டியின் 84 ஆவது நிமிடத்தில் Torres ஸ்பெயின் அணி சார்பில் 3 ஆவது  கோலை  போட்டார். 3 ஆவது கோல் போடப்பட்ட நான்கு நிமிடங்களின் பின்னர் அதாவது போட்டியின் 88 ஆவது நிமிடத்தில் Torres இடமிருந்து பந்தை பெற்றுக் கொண்ட Juana Mata 4 ஆவது கோலைப்போட்டார். 

அந்த வகையில் 4 - 0 என்ற கோல் கணக்கில் இந்த போட்டியில் இத்தாலியை வீழ்த்தி சம்பியனானது ஸ்பெயின். இதன் மூலம்  இரண்டாவது தடவையாக தொடர்ந்து (2008 , 2012) ஐரோப்பிய சம்பியன் பட்டத்தை வென்று புதிய சாதனை படைத்துள்ளதுடன், நடப்பு உலக கோப்பை சாம்பியன், நடப்பு ஐரோப்பிய கோப்பை சாம்பியன் உலகின் நம்.1 அணியென தன்னை மீண்டும் நிரூபித்துள்ளது. மேலும் ஸ்பெயின் இதுவரை  மூன்று முறை ஐரோப்பியக் கிண்ணத்தை கைப்பற்றியுள்ளதுடன் (1964 , 2008 , 2012 ), ஒரு முறை இறுதிப்போட்டி வரை முன்னேறி சம்பியன் பட்டத்தை பெற முடியாமலும் போயிருந்தது(1984 ). அத்துடன் இத்தாலியானது இரண்டாவது முறையாக இறுதிப்போட்டி வரை சென்று சம்பியன் பட்டத்தை பெற தவறியுள்ளது(2000 , 2012 ) என்பதுடன் இதுவரையில் சம்பியன் பட்டம் பெறவில்லை என்பதும் குறிப்பிடத்தக்கது.

அண்மைய அரசியல் செய்திகளை தொகுத்து...

இலங்கை அரசியல் அரங்கில் ஒரு சில பாரிய மாற்றங்கள் நிகழ்வதற்கான சாத்தியக் கூறுகள் இருப்பதாக அரசியல் ஆய்வாளர்கள் கூறுகின்றார்கள். குறிப்பாக முன்னாள் ராணுவத் தளபதி சரத் பொன்சேகாவின் விடுதலையுடன் இலங்கையின் வெளியுறவுக் கொள்கைகளில் மாற்றங்கள் வரலாம் என்ற கருத்துக்கள், எதிர்வு கூறல்கள் முன்வைக்கப்பட்டிருந்தன. எனினும் இவ்வாறான கருத்துக்கள், எதிர்வு கூறல்கள் ஒன்றும் புதியவையல்ல. உண்மையில் இலங்கையில் 2010 ஆம் ஆண்டு ஜனாதிபதித் தேர்தல் நடைபெற்ற காலத்திலும் இதுபோன்ற பாரிய மாற்றம் ஒன்று இலங்கையில் நிகழ வாய்ப்பிருப்பதான எதிர்பார்ப்பு வெளியிடப்பட்டது. ஆனாலும் சொல்லப்பட்ட அளவுக்கு பெரியளவில் எதுவும் நடந்துவிடவில்லை.

இதே போன்றுதான் சரத்பொன்சேகாவின் விடுதலையின் பின்னர் இலங்கை அமெரிக்காவுடன் நெருக்கமான உறவுகளை பேணும் வகையில் தனது வெளியுறவுக் கொள்கைகளில் மாற்றங்களை கொண்டுவர இருப்பதாகவும், அதற்குரிய முன்னெடுப்புக்கள் மேற்கொள்ளப்படுவதாகவும் தெரிவிக்கப்பட்டது. எனினும் அண்மையில் நடைபெற்ற ரியோ பிளஸ் மாநாட்டின் போது இலங்கை ஜனாதிபதியும், ஈரானிய ஜனாதிபதியும் சந்தித்து புதிய உலக ஒழுங்கு ஒன்று உருவாக்கப்பட வேண்டும் என பேச்சு நடத்தியதாக தெரியவருகின்றது. மேலும் இந்த பேச்சுக்கள் குறித்து ஈரானிய ஜனாதிபதி வெளியிட்ட அமெரிக்காவுக்கு எதிரான குற்றச்சாட்டுக்களுடன் இலங்கை ஜனாதிபதியும் உடன்பட்டதாக ஊடகங்கள் செய்தி வெளியிட்டுள்ளன.

இந்த நிலையில் இலங்கை அமெரிக்காவுடன் நெருக்கமான வெளியுறவுக் கொள்கைகளை உருவாக்க முயற்சிப்பதான செய்தி கேள்விக் குறியாகின்றது என்கின்ற போதிலும் கடந்த மே 18 ஆம் திகதி அமெரிக்க வெளியுறவுச் செயலாளர் ஹில்லாரி கிளிண்டனை இலங்கையின் வெளியுறவுத் துறை அமைச்சர் ஜி.எல்.பீரிஸ் சந்தித்த போது கற்றுக் கொண்ட பாடங்கள் மற்றும் நல்லிணக்க ஆணைக் குழு முன்வைத்த பரிந்துரைகளில் குறுகிய காலத்தில் செயற்படுத்தக் கூடியவற்றை உடனடியாகவும், நடுத்தர மற்றும் இறுதி யுத்தம் தொடர்பான அம்சங்களை உரிய காலத்திலும் நிறைவேற்ற உள்ளதாக உறுதியளிக்கப்பட்டதாகவும் இதனையே ஹில்லாரி கிளிண்டன் செயற்திறன் மிக்க நல்ல திட்டம் ஒன்றை இலங்கை கையளித்துள்ளது என குறிப்பிட்டதாகவும் செய்திகள் வெளியாகியுள்ளன. எனினும் இவ்வாறான எந்தவொரு ஆவணத்தையும் அமெரிக்காவிடம் தாம் கையளிக்கவில்லை என வெளியுறவுத் துறை அமைச்சர் ஜி.எல்.பிரீஸ் குறிப்பிட்டுள்ளார்.

இலங்கையின் முன்னணி செய்திப்பத்திரிகையான சண்டே லீடர் பத்திரிகை வெளியிட்ட மேற்படி செய்தி தொடர்பில் மேலும், மேலும் மறுப்பறிக்கைகள் வெளியிடப்படும் பட்சத்தில் இலங்கை அமெரிக்காவிடம் கையளித்த உறுதி மொழி ஆவணத்தை தாம் வெளியிடப்போவதாகவும் சண்டே லீடர் பத்திரிகை எச்சரித்துள்ளது.

இது இவ்வாறு இருக்க ஜெனீவா தீர்மானத்தின் பின்னர் இலங்கைக்கும், இந்தியாவுக்கும் இடையிலும் பாரிய இடைவெளி ஒன்று காணப்படுவதாகவும் செய்திகள் வெளியாகியுள்ளன.இந்தியாவின் இலங்கைக்கு எதிரான வாக்களிப்பால் இந்தியாவுடனான இலங்கையின் நெருக்கமான உறவுகளில் விரிசல் பல்வேறு வகையிலும் வெளிப்படுத்தப்பட்டு வருவதாகவே தெரிகின்றது. குறிப்பாக இந்திய தேசிய பாதுகாப்பு ஆலோசகர் சிவ்சங்கர் மேனன் கொழும்பிற்கான விஜயம் ஒன்றை மேற்கொள்ளவிருப்பதாக இந்திய ஊடகங்களில் செய்திகள் வெளியாகிய போதும் இலங்கை வெளியுறவுத் துறை அமைச்சு அப்படியான விஜயம் குறித்து தமக்கு எதுவும் தெரியாது என குறிப்பிட்டுள்ளதன் மூலம் இதனை தெளிவாக உணர முடிவதாக கூறப்படுகின்றது.

மேலும் தமிழகத்துடன் இலங்கை அரசு ஒரு ஆரோக்கியமான உறவைக் கட்டியெழுப்ப பல்வேறு வழிகளிலும் முயன்று வருவதாகவும் தகவல்கள் வெளியாகியுள்ளன. உண்மையில் இன்று தமிழகத்துக்கு இலங்கை அரசு சார்பில் எந்தவொரு பிரமுகர்களும் சென்றாலும் அங்கு கடுமையான எதிர்ப்பை சந்திக்கும் நிலைமையே உள்ளது. அண்மையில் கோவையில் ஒரு கருத்தரங்கிற்கு சென்றிருந்த அமைச்சர் ரெஜினோல்ட் குரேயிற்கு எதிராக போராட்டம் நடாத்தப்பட்டதால் அவர் உடனடியாக நாடு திரும்பியிருந்தார். இவ்வாறான சூழ் நிலையில்தான் இந்திய மத்திய அரசுடன் மந்தமான உறவு இருக்கின்ற போதும் தமிழகம் போன்ற இந்திய மாநில அரசுகளுடன் நெருக்கமான உறவைப்பேண இலங்கை அரசாங்கம் முயற்சிக்கின்றது.

உண்மையில் இந்திய மத்திய அரசு ஜெனீவா பிரேரணையில் இலங்கை அரசுக்கு எதிராக வாக்களிக்க தமிழகத்தின் நெருக்குதலும் ஒரு காரணம் என்பதனை மறுப்பதற்கில்லை. இதன் காரணமாகவும், ஜே.ஆர்.ஜெயவர்த்தன காலத்தில் இலங்கை அரசு இந்தியாவுடனான உறவுகளை சுருக்கியதன் விளைவாகவே இலங்கையில் தமிழ் இளைஞர், யுவதிகளிற்கு ஆயுதப் பயிற்சிகளையும், உதவிகளையும் இந்தியா வழங்கியது என்பதன் அடிப்படையிலும் இலங்கை அரசு இந்தியாவின் மாநில அரசுகளுடன் நெருக்கமான உறவுகளை பேண விளைவதாக சொல்லப்படுகின்றது.

இலங்கை அரசு மாநில அரசுகளுடன் குறிப்பாக தமிழகத்துடன் ஆரோக்கியமான உறவை வளர்த்துக்கொள்ள விளைவதான செய்திகள் வெளிவருகின்ற அதே சமயம் இலங்கை கடற்படையினரால் தமிழக மீனவர்கள் தாக்கப்படுவது நிறுத்தப்படவில்லை என்பதுடன் கச்ச தீவுக்கு வரும் தமிழக மீனவர்களை கைது செய்து இருபது ஆண்டுகள் சிறைத்தண்டனை விதிக்கப்படும் என்கின்ற தோரணையில் இலங்கை ஜனாதிபதி மஹிந்த ராஜபக்ஷவும் கருத்து வெளியிட்டுள்ளார்.

இதே வேளை இலங்கை அரசின் அண்மைக்கால போக்கு தொடர்பில் இந்திய அரசும் அதிக கவலை கொண்டிருப்பதாகவே தெரிகின்றது. குறிப்பாக தமிழீழ விடுதலைப்புலிகளை அழிக்கும் ஒரே நோக்கத்திற்காக இலங்கை அரசின் எந்தவொரு போக்கு குறித்தும் கரிசனை இல்லாமல் இருந்த இந்தியா இன்று சீனாவுடனான இலங்கை அரசாங்கத்தின் அதீத நெருக்கம் காரணமாக பல்வேறு நெருக்கடிகளிற்கு முகம்கொடுத்துள்ளதாக தெரிவிக்கப்படுகின்றது. இவ்வாறான ஒரு சூழ் நிலையிலையே இலங்கை அரசை கண்டிக்கும் வகையில் ஜூன் 29 ஆம் திகதி சிவ்சங்கர் மேனன் இலங்கை செல்லவுள்ளதாகவும் குறிப்பிடப்படுகின்றது.

இலங்கையின் வெளியுறவுத் தொடர்புகள் குறித்தான விடயங்கள் இவ்வாறு இருக்க, இலங்கையில் இன்று தமிழ் அரசியல் சக்திகளிடையே எவருமே எதிர்பார்க்காத அளவுக்கு ஒரு ஒற்றுமை நிலைமை ஏற்பட்டுள்ளதாக தெரிகின்றது. குறிப்பாக தமிழ்த் தேசியக் கூட்டமைப்பு தொடர்பிலும், அதன் பாராளுமன்ற குழுத் தலைவர் இரா. சம்பந்தன் தொடர்பிலும் பல்வேறு விமர்சனங்கள் எழுந்த நிலையில் இன்று தமிழ் அரசியல் சக்திகள் தமிழ் சமூகத்தின் நிலங்கள் பறிபோவதற்கு எதிராக ஒன்று சேர்ந்துள்ளமை வரவேற்கப்பட வேண்டிய ஒரு விடயமாகும்.

அந்த வகையில் முன்பு தமிழ்த் தேசியக் கூட்டமைப்பில் அங்கம் வகித்து இப்போது தமிழ்த் தேசிய முன்னணி என்கின்ற கட்சியில் இயங்கிவரும் செல்வராசா கஜேந்திரன் தலைமையிலானவர்கள் ஏற்பாடு செய்த நில அபகரிப்புக்கு எதிரான போராட்டத்திற்கு தமிழ்த் தேசியக் கூட்டமைப்பு, ஜனநாயக மக்கள் முன்னணி போன்ற முக்கிய கட்சிகள் தமது ஆதரவை தெரிவித்து பங்குபற்றியதன் மூலம் தமிழ் சமூகம் ஒற்றுமையுடன் போராடுவதற்கு வழி ஏற்பட்டுள்ளதாக உணர முடிகின்றது.

மேலும் சரணாகதி அரசியலில் பல காலமாக ஈடுபட்டுவரும் தமிழ் அரசியல் தலைவர்களும் நில அபகரிப்பை ஏற்றுக் கொள்ள முடியாது என்றும், அதனை வன்மையாக கண்டிப்பதாகவும் தெரிவித்துள்ளமை வரவேற்கப்பட வேண்டிய ஒன்றே. ஸ்ரீலங்கா முஸ்லீம் காங்கிரசும் நில அபகரிப்புக்கு எதிரான போரில் தமிழ்த் தேசியக் கூட்டமைப்புடன் கரம் கோர்க்க போவதாகவும் கூறப்படுகின்றது. அண்மைக் காலமாக இலங்கை அரங்கில் வடக்கு, கிழக்கு தவிர்ந்த ஏனைய பகுதிகளிலும் முஸ்லீம் சமூகத்துக்கு எதிராக சிங்கள சமூகம் சில நாசகார வேளைகளில் ஈடுபட்டுள்ளமை முஸ்லீம் அரசியல் தலைவர்களை கொஞ்சம் சிந்திக்க வைத்துள்ளது என்றே சொல்ல வேண்டும்.

குறிப்பாக அரசாங்கத்தில் அங்கம் வகிக்கும் கைத் தொழில் மற்றும் வணிகத்துறை அமைச்சர் ரிசாட் பதியுதீன் முஸ்லீம்கள் எதிர்கொள்ளும் பிரச்சினைக்கு உரிய தீர்வு காணப்படாவிட்டால் அமைச்சு பதவியை ராஜினாமா செய்யப்போவதாக கூறியிருந்தார். மேலும் வடக்கு, கிழக்கில் காணிகளை படையினர் பயன்படுத்துவது தொடர்பிலும் அவர் தனது எதிர்ப்பை வெளியிட்டுள்ளார். ஒரு அரசாங்க அமைச்சர் இவ்வாறான கருத்தை வெளியிட்டுள்ள நிலையில் இலங்கை அரசாங்கம் வடக்கு , கிழக்கில் அவ்வாறான எந்தவொரு சம்பவமும் நடைபெறவில்லை என கூறுவது வேடிக்கையானது.

இந்த நிலையில் தமிழ் பேசும் சமூகத்தின் எதிர்காலம் என்பது இலங்கை நாட்டில் எப்படி அமைய வேண்டும் என்பதை தீர்மானிக்க போகும் தமிழ் அரசியல் சக்திகள் தங்கள் ஒற்றுமையை தொடர்ந்தும் பேணிப்பாதுகாத்து தீர்வை நோக்கிய பயணத்தை வெற்றிகரமாக்குவது அவசியமாகும்.

காணி, பொலிஸ் அதிகாரம் இல்லாத தீர்வை காண பாராளுமன்ற தெரிவுக் குழு தேவையா?

இன்றைய இலங்கையின் அரசியல் அரங்கில் இனப்பிரச்சினை தீர்வு தொடர்பில் ஜனாதிபதியும், அராசங்கமும் வெளியிட்ட கருத்துக்களும் அதற்கு தமிழர் தரப்பின் சார்பில் பேச்சுக்களில் பங்கெடுக்கும் தமிழ்த் தேசியக் கூட்டமைப்பிடமிருந்து வந்திருக்கும் பதிலுமே அதிகமாக பேசப்படும் விடயமாக உள்ளது. ஆங்கிலேயரின் ஆட்சிக்கு பிற்பட்ட காலத்தில் அதாவது இலங்கையின் சுதந்திரத்துக்கு பின்னர் பெரியளவில் விஸ்வரூபம் எடுத்த இலங்கையின் இனப்பிரச்சினையானது காலத்திற்கு காலம் ஆட்சியில் அமர்ந்த அரசாங்கங்களாலும் அதன் தலைமைகளாலும் வெவ்வேறு வகையில் கையாளப்பட்டமை வரலாறு.

இருந்த போதிலும் இனப்பிரச்சினைக்கான தீர்வு தொடர்பில் ஆட்சியில் அமர்ந்த அரசாங்கங்களிடமோ அதன் தலைமைகளிடமோ தெளிவான ஒரு கொள்கை இருக்கவில்லை. இதனால் தமது உரிமைகளை வென்றெடுப்பதற்காக தமிழ் பேசும் இனம் சாத்வீக வழியில் பல்வேறு போராட்டங்களை முன்னெடுத்து அதன் மூலம் எந்தவித பயனும் இல்லை என்கின்ற நிலையில் சுமார் முப்பது வருடங்களுக்கு முன்னர் தமிழர்களுக்கு ஓர் தனி நாடு அது தமிழீழம் என்கின்ற கொள்கையுடன் ஆயுத வழியில் போராட்டங்களை ஆரம்பித்தது. பல்வேறு ஆயுதக் குழுக்களாக ஆரம்பித்த ஆயுதப் போராட்டத்தில் துரோகங்கள், விலை போதல்கள் என்பவற்றிற்குள் சிக்குண்டு பல இயக்கங்கள் மீண்டும் ஜனநாயக வழி முறைக்கு திரும்பியதுடன் இன்னும் சில குழுக்கள் ஆயுதம் எந்தியதன் நோக்கம் மறந்து தமது ஆயுதங்களை சக இயக்கங்களிற்கு எதிராக திருப்பின. இவ்வாறான ஆயுத போராட்ட காலமும் தமிழீழ விடுதலைப் புலிகளின் பின்னடைவுடன் கடந்த 2009 ஆண்டு மே மாதத்துடன் நிறைவுக்கு வந்தது.

விடுதலைப் புலிகளின் பின்னடைவுக்கு முன்னர் அதாவது விடுதலைப் புலிகள் பலமான ஒரு இராணுவக் கட்டமைப்பாக இருந்த காலப் பகுதியில் தமிழீழ விடுதலைப் புலிகளின் தனி நாட்டுக் கோரிக்கையை ஏற்றுக் கொள்ள முடியாது என்றும் இனப்பிரச்சினைக்கான தீர்வு தொடர்பில் 13 ஆவது அரசியலமைப்பு திருத்தத்திற்கு அப்பால் சென்று ஒரே நாட்டுக்குள் அதிகாரப்பரவலாக்கலாக அமையும் என்ற வகையில் அரச தரப்பிலிருந்து கருத்துக்கள் வெளிவந்தன. மேலும் நாட்டில் உள்ள பயங்கர வாதத்தை ஒழித்துவிட்டு தீர்வை முன் வைக்க போவதாக ஜனாதிபதி மஹிந்த ராஜபக்ஷ தலைமையிலான அரசாங்கம் கூறியது. ஆனால் இப்போது புலிகளை அழித்துவிட்டதாக அரசாங்கம் அறிவித்து இரண்டரை வருடங்கள் கடந்த நிலையில் தமிழ்த் தேசியக் கூட்டமைப்புடன் பல சுற்றுப் பேச்சுக்கள் நிறைவடைந்த தருணத்தில் ஜனாதிபதி மாகாண சபைகளுக்கு காணி, பொலிஸ் அதிகாரங்களை வழங்க முடியாது என்றும் வடக்கு கிழக்கை மீள இணைக்க முடியாது என்றும் கூறியுள்ளார்.

மேலும் மேற்குலகின் விருப்பபடி குறிப்பாக அமெரிக்காவின் விருப்பபடி செயற்பட முடியாது என்றும் அவர் சொல்லியுள்ளார். இதுமட்டுமல்லாமல் இனப்பிரச்சினைக்கான தீர்வை காண முடியாமல் இருப்பதற்கு தமிழர் தரப்பே காரணமாக இருப்பதாகவும், புலிகளைப் போன்று தமிழ்தேசியக் கூட்டமைப்பு செயற்படுகின்றது என்றும் அவர் குறிப்பிட்டுள்ளார். இதனை விட தமிழ்த் தேசியக் கூட்டமைப்பு இனப்பிரச்சினைக்கான தீர்வு தொடர்பில் அமைக்கப்படவுள்ள பாராளுமன்றத் தெரிவுக் குழுவிற்கு உறுப்பினர்களை நியமிக்கவில்லை என்கின்ற குற்றச் சாட்டையும் முன்வைத்துள்ளார்.

ஜனாதிபதியின் கருத்துக்கள் இவ்வாறு அமைகின்ற அதே வேளை அரசாங்க அமைச்சர்களும் தமிழ்தேசியக் கூட்டமைப்பின் காணி, பொலிஸ் அதிகாரங்கள், வடக்கு கிழக்கு இணைப்பு போன்ற கோரிக்கைகள் ஏற்றுக் கொள்ள முடியாதவை என்று சொல்லியுள்ளனர். குறிப்பாக பொருளாதார அபிவிருத்தி அமைச்சர் பசில் ராஜபக்ஷ இவ்வளவு காலமும் தமிழ்த் தேசியக் கூட்டமைப்பு ஸ்ரீலங்கா சுதந்திரக் கட்சியுடனேயே பேச்சுவார்த்தை நடாத்தியதாகவும் பாராளுமன்றத் தெரிவுக் குழுவிற்கு பிரதிநிதிகளை நியமிப்பதன் மூலம் தமிழ்த் தேசியக் கூட்டமைப்பு அரசாங்கத்துடன் பேச்சுவார்த்தையில் பங்கெடுக்கலாம் என்றும் சொல்லியுள்ளார். தமிழர்களைப் பொறுத்தவரையில் இனப்பிரச்சினை விடயத்தில் பல்வேறு ஒப்பந்தங்களையும், ஆணைக் குழுக்களையும் கண்டுள்ளனர்.

யுத்த காலத்தில் பேராசிரியர் திஸ்ஸ விதாரண தலைமையில் உருவாக்கப்பட்ட சர்வகட்சிக் குழு இதற்கு ஓர் சிறந்த உதாரணம் நூற்றுக்கும் அதிகமான தடைவை கூடிய இந்தக் குழுவின் பரிந்துரைகள் தொடர்பில் அரசாங்கம் அக்கறை செலுத்தியதா? மேலும் இந்த குழுவின் தலைவராக செய்யப்பட்ட பேராசிரியர் திஸ்ஸ விதாரண அண்மையில் ஒரு கருத்தினை வெளியிட்டிருந்தார்.
அதாவது ""தேசிய பாதுகாப்பிற்கு அச்சுறுத்தல் ஏற்படாத வகையில் பொலிஸ் மற்றும் காணி அதிகாரங்களை இனப்பிரச்சினைக்கான தீர்வுத் திட்டத்தில் உள்ளடக்க முடியும். எனவே அரசாங்கம் பேச்சுக்களில் விரிசல் ஏற்படுத்திக் கொள்ளாது நிரந்தர தீர்வொன்றிற்காக கூட்டமைப்புடன் இணைந்து முன்னகர வேண்டும். வடக்கு மற்றும் கிழக்கை மீள் இணைப்பது குறித்து தற்போது பேச்சுவார்த்தை நடாத்துவதில் அர்த்தமில்லை. ஆகவே இருதரப்பும் இணக்கப்பாட்டின் அடிப்படையில் விரைவான தீர்வொன்றுக்கு வர வேண்டும். இழுத்தடிப்பதால் யாருக்கும் பயனேற்படப் போவதில்லை."" என்று பேராசிரியர் திஸ்ஸ விதாரண தெரிவித்திருந்தார்.

இங்கு பேராசிரியர் குறிப்பிட்ட இழுத்தடித்தல் என்கின்ற சொல் மிகவும் முக்கியமானது. இலங்கை அரசியல் வரலாற்றில் மாறி மாறி ஆட்சிக்கு வந்த அரசாங்கங்களும், அதன் தலைமைகளும் இனப்பிரச்சினை தொடர்பில் இழுத்தடிக்கின்ற உத்தியையே கால காலமாக பின்பற்றியிருக்கின்றன. ஆட்சியாளர்களின் இவ்வாறான போக்கால்தான் முப்பது வருடங்களுக்கு முன்னர் தமிழர்கள் ஆயுதம் எந்த நிர்ப்பந்திக்கப்பட்டனர். இந்த நிலையில் காணி, பொலிஸ் அதிகாரங்கள் இல்லாத பிரிந்த வடக்குக் கிழக்கிற்குள் அரசாங்கம் எவ்வாறான அரசியல் தீர்வை முன்வைக்க பாராளுமன்ற பிரதிநிதிகள் குழுவை நியமிக்கின்றது? இதற்கு ஒரு குழு நிச்சயம் தேவைதானா? இவ்வாறான ஒரு தீர்வைக் கூட அரசாங்கம் சுயமாக முன்வைக்க முடியாத நிலையிலா உள்ளது? இவையெல்லாம் தவிர்க்க முடியாத கேள்விகள்.

பாராளுமன்றத்தில் 2 / 3 பெரும்பான்மை உள்ள இன்றைய அரசாங்கத்திற்கு இனப்பிரச்சினைக்கான தீர்வை காண்பதில் உண்மையான அக்கறை இருக்குமானால் அதனை செய்வது ஒன்றும் பெரிய விடயமல்ல. ஆனால் அரசாங்கம் ஒரு போதும் அதனை செய்ய தயாரில்லை என்பதுடன் இந்த அரசாங்கமும் இழுத்தடிக்கும் உத்தியையே கையாளப்போகிறது என்பதையும் பாராளுமன்ற தெரிவுக் குழுவின் நியமிப்பு வெளிப்படுத்துகின்றது.

இங்கு வேடிக்கையான விடயம் என்னவென்றால் தமிழீழ விடுதலைப் புலிகள் பலமான அமைப்பாக இருந்து பேச்சு வார்த்தைகளில் பங்கெடுக்கும்போது அவர்களின் தனி நாட்டுக் கோரிக்கை நியாயமற்றது என்றும் மத்தியில் கூட்டாட்சி மாநிலத்தில் சுயாட்சி, ஒன்றுபட்ட இலங்கைக்குள் இன ஐக்கியத்துடன் தீர்வு, சமஷ்டி ஆட்சி என்று வெவ்வேறு தீர்வுத்திட்டங்களை முன்வைத்த அரச ஆதரவு தமிழ்க் கட்சிகளும் அரசியல்வாதிகளும் இப்போது அமைதியாக இருக்கிறார்கள். முன்பு புலிப் பயங்கரவாதத்தால்தான் தீர்வைக் காண முடியாமல் உள்ளது என்று உள்நாட்டிலும் வெளிநாட்டிலும் முழங்கியவர்கள் இப்போது மூலைக்குள் முடங்கியுள்ளனர். இருந்த போதிலும் அரசாங்கத்தில் உள்ள ஜனநாயக மக்கள் காங்கிரஸ் தலைவர் பாராளுமன்ற உறுப்பினர் பிரபா கணேஷன், முஸ்லீம் காங்கிரஸ் பாராளுமன்ற உறுப்பினர்கள் ஜனாதிபதியின் அறிவிப்புத் தொடர்பில் தங்கள் அதிர்ச்சியை வெளிப்படுத்தியிருந்தனர்.


இதேவேளை தமிழ்த் தேசியக் கூட்டமைப்பு அரசாங்கத்துடன் பேச்சு வார்த்தையை ஆரம்பித்த காலம் தொடக்கம் இப்போது வரையிலும் தமிழ்த் தேசியக் கூட்டமைப்பு தமிழ் சமூகத்தில் சிலரால் கடுமையாக விமர்சிக்கப்பட்டு வருகின்றது. அண்மையில் வெளிவந்த தமிழ் சிவில் சமூகத்தின் அறிக்கை இதன் உச்சக் கட்டம் என்று சொல்லலாம். அந்த வகையில் தமிழ் சிவில் சமூகம் என்கின்ற பெயரில் வெளியிடப்பட்டுள்ள அறிக்கையில் தமிழ்த் தேசியக் கூட்டமைப்பின் கடந்த கால தவறுகள் என்று சில விடயங்களும் எதிர்காலத்தில் செய்ய வேண்டியவை என்று சில விடயங்களும் குறிப்பிடப்பட்டுள்ளன. அதில் குறிப்பாக வட மாகாண சபைத் தேர்தலில் தமிழ்தேசியக் கூட்டமைப்பு போட்டியிடக் கூடாது என்பது தொடர்பில் அதிகமாக விளக்கப்பட்டுள்ளமையானது இந்த அறிக்கையின் பின்னணியில் முன்னாள் தமிழ்த் தேசியக் கூட்டமைப்பின் பாராளுமன்ற உறுப்பினர்கள் சிலர் இருக்கலாம் என்கின்ற சந்தேகத்தை ஏற்படுத்தியுள்ளது.

உண்மையில் பொதுவாக தவறுகளை சுட்டிக் காட்டியும், போதுமான ஆலோசனைகளை முன்வைத்தும் புத்திஜீவிகளிடமிருந்து கருத்துக்கள், அறிக்கைகள் வெளிவருவது ஆரோக்கியமானது என்கின்ற போதிலும் அந்த அறிக்கைகள் வெளிவரும் காலப்பகுதியையும் கொஞ்சம் கவனத்தில் எடுக்க வேண்டும். இன்றைய நிலையில் தமிழர்கள் தமது ஒன்றுபட்ட அரசியல் சக்தியை சீர் குலைக்காமல் மென்மேலும் பலப்படுத்த வேண்டுமே தவிர பலவீனப்படுத்தக் கூடாது. அவ்வாறு பலவீனப்படுத்தும் பட்சத்தில் இனப்பிரச்சினைத் தீர்வு விடயத்தில் அரசாங்கத்தின் இழுத்தடிக்கும் உத்திக்கு தூபமிடுவதாகவே அது அமையும்.

தமிழ் சிவில் சமூகம் என்கின்ற பெயரில் வெளிவந்த அறிக்கை ஒருபுறமிருக்க ஜனாதிபதி இந்தியாவில் இருந்து வெளியாகும் ‘டெக்கன் குரோனிக்கல்‘ நாளேட்டின் செய்தியாளர் பகவான் சிங்கிற்கு அலரி மாளிகையில் வைத்து அளித்துள்ள செவ்வி ஒன்றில் தன்னை மேற்குலகம் தங்களின் அடிமையாக வைத்திருக்க முயல்வதாகவும் இதற்கு ஒரு போதும் இடமளிக்கப் போவதில்லை என்றும் இந்தியாவை தாண்டியே இலங்கைக்கு எல்லாம் என்றும் கூறியுள்ளார். இதுமட்டுமல்லாமல் அவர் தனது செவ்வியில் இதுவரை காலமும் இல்லாத அளவுக்கு அமெரிக்காவை பகிரங்கமாகவே சாடியுள்ளார். புலிகளின் கப்பல்களை அழிப்பதற்கான புலனாய்வுத் தகவல்களை அமெரிக்காவே வழங்கியது என்றும் அவர் குறிப்பிட்டுள்ளார்.

இலங்கையின் கடந்த கால அரசியல் வரலாற்றை எடுத்துக் கொண்டால் அதாவது சுதந்திரத்துக்கு பின்னர் எந்தவொரு ஜனாதிபதியோ அல்லது அரசாங்கமோ வெளிநாடுகள் தொடர்பில் எதிரான கருத்துக்களை வெளிப்படையாக தெரிவிப்பது குறைவு அல்லது இல்லை என்றே சொல்ல வேண்டும். இதனால்தான் என்னவோ இலங்கைக்கு பகையான நாடுகள் என்று எதுவும் இல்லை. மேலும் இலங்கை ஒரு தீவாக இருப்பதால் எல்லைப் பிரச்சினையும் இல்லை. இந்த நிலையில் அபிவிருத்தியடைந்து வரும் ஒரு நாடான இலங்கை வெவ்வேறு நாடுகளில் பொருளாதாரத்தில் தங்கியுள்ளது என்பதால் எந்தவொரு நாட்டையும் அரசியல் ரீதியான கருத்துக்களால் பகைத்துக் கொள்வது நல்லதல்ல. இலங்கை மீது வெளி நாடுகள் பொருளாதார ரீதியான தடைகளை விதித்தாலோ அல்லது ராணுவ ரீதியிலான தலையீடுகளை மேட்கொண்டாலோ அதனை எதிர்கொள்ளும் அளவுக்கு போதுமான வளங்களும் இலங்கையில் இல்லை. இந்த நிலையில் எந்தவொரு நாடு தொடர்பிலும் வெளிப்படையான எதிர்க் கருத்துக்களை முன்வைப்பதை தவிர்ப்பதே நல்லது.

உண்மையில் இலங்கை தொடர்பில் மேற்குலகம் கொண்டுள்ள நிலைப்பாடுகள் மாற வேண்டும் என்றால் இனப்பிரச்சினைக்கு நியாயமான அரசியல் தீர்வு விரைந்து காணப்பட வேண்டும். இதன் மூலம் மேற்குலகின் தேவையற்ற தலையீடுகள் குறைவடைவதுடன் இலங்கை என்பது பலமான ஒரு நாடாக திகழவும் வாய்ப்புள்ளது. இதனை விடுத்து தமிழர்கள் கேட்கும் குறைந்த பட்ச அதிகாரப் பகிர்வான இணைந்த வடக்குக் கிழக்கில் காணி பொலிஸ் அதிகாரங்களை கூட வழங்குவதற்கு அரசாங்கம் முன்வராவிட்டால் வெளிநாடுகளின் தலையீடுகளையும் தவிர்க்க முடியாது, தமிழர்களின் மனங்களையும் வென்றெடுக்க முடியாது.

பலே பாகிஸ்தான் 2

எழுதுவதற்கு நிறைய விடயங்கள் உண்டு. எழுதத்தான் நேரம் கிடைப்பதில்லை. இன்று கட்டாயம் ஏதாவது எழுதியே ஆக வேண்டும் என்று நினைத்தால் உடனே ஞாபகம் வந்தது பாகிஸ்தான் அணிதான். பாகிஸ்தான் அணி என்றால் சர்ச்சை சர்ச்சை என்றால் பாகிஸ்தான் அணி. இது அடிக்கடி முன்பு நான் அறிவிப்பாளராக இருந்த வானொலியில் விளையாட்டு உலகம் நிகழ்ச்சியை செய்யும் போதும், இப்போது நமது வன்னி fm சஞ்ஜீவ ஒலியில் ஆடுகளம் நிகழ்ச்சியை படைக்கும் போதும் நான் அடிக்கடி சொல்லிக் கொள்ளும் ஒன்று. அப்படியொன்றும் பாகிஸ்தான் அணி மேல் வெறுப்பெல்லாம் கிடையாது. உண்மையை சொல்லணும் என்றால் இந்த விளையாட்டில் அதுதாங்க கிரிக்கட்டில் எந்த அணிக்கு நான் சப்போர்ட் என்று எனக்கே தெரியாது.

ஒரு நாள் முன்பு நான் அறிவிப்பாளராக இருந்த வானொலியில் நிகழ்ச்சி செய்யும் போது இலங்கை மற்றும் இந்திய அணிகளுக்கிடையில் போட்டி நடை பெற்றுக் கொண்டிருந்தது நாங்களும் பரபரப்பாக போட்டி முடிவுகளை சொல்லிக் கொண்டிருந்தோம். இந்த நேரத்தில் கட்டாரில் இருந்து ஒரு நேயர் நேரடியாக வானொலியில் பேசிக் கொண்டிருக்கும் போது செந்தூரன் நீங்கள் எந்த அணிக்கு சப்போர்ட் என்று கேட்டார்? ஒரு அறிவிப்பாளரிடம் நேரடியாக இவ்வாறு கேட்கப்படும் கேள்விகள் மிகவும் தர்ம சங்கடமானவை. நான் எந்த அணிக்கும் சப்போர்ட் இல்லை என்று சொன்னால் சும்மா சொல்லுங்களன் என்று கேட்பார்கள். உடனே எந்த அணி வெற்றி பெறுகிறதோ அந்த அணிக்கு சப்போர்ட் என்று சொன்னேன். நேயர் நண்பரும் சிரித்துக் கொண்டிருக்கவே பேச்சை திசை திருப்ப முடிந்தது. இவையெல்லாம் வானொலியில் பெற்ற சின்ன சின்ன அனுபவங்கள்.

சரி இவை எல்லாம் ஒரு புறம் இருக்கட்டும் இன்றைய பதிவின் தலைப்புக்கு வரலாம். கிரிக்கட் சூதாட்டத்தில் ஈடுபட்ட பாகிஸ்தான் அணியின் இரண்டு வீரர்களுக்கு சிறைத் தண்டனை ஒரு வீரர் சீர் திருத்தப்பள்ளியில்.... ஊக்க மருந்து பாவித்தமையால் பாகிஸ்தான் அணியின் வேகப்பந்து வீச்சாளர் அக்தருக்கு ஒரு வருட போட்டித் தடை... பாகிஸ்தான் பயிற்சியாளருக்கும் அணித் தலைவருக்குமிடையில் சுமூகமான உறவில்லை... போதியளவு பாதுகாப்பின்மை காரணமாக பாகிஸ்தானுக்கு சுற்றுப்பயணம் மேற்கொள்ள தென்னாபிரிக்க அணி மறுப்பு... தரவரிசை பட்டியலில் பாகிஸ்தான் பின்னடைவு...இப்படி பாகிஸ்தான் அணி பற்றியும் வீரர்கள் பற்றியும் கடந்த சில வருடங்களாக வெளி வந்த செய்திகளும் போட்டிகளில் பாகிஸ்தான் அணி முத்திரை பதிக்க தவறியமையும் பாகிஸ்தான் ரசிகர்களிடையே மட்டுமன்றி ஒட்டுமொத்த கிரிக்கட் ரசிகர்களிடையேயும் ஒரு வித பாதிப்பை ஏற்படுத்தியிருக்கும் என்பதை மறுப்பதற்கில்லை. இந்த நிலையில் இலங்கை அணியுடனான போட்டியில் பாகிஸ்தான் அணி அபரிமிதமான எழுச்சியை காட்டியுள்ளது.

அந்த வகையில் இலங்கை அணியுடனான 3 போட்டிகள் கொண்ட test தொடரை பாகிஸ்தான் அணி 1 - 0 என்ற கணக்கில் வென்றுள்ளது. அந்த வகையில் இரண்டு போட்டிகள் சம நிலையில் நிறைவடைந்துள்ளன. இதே போன்று 5 போட்டிகள் கொண்ட ஒரு நாள் தொடரை பாகிஸ்தான் 4 - 1 என்ற கணக்கில் வென்றுள்ளது. இங்கு இலங்கை அணியைப் பொறுத்த வரையில் கடந்த உலகக் கிண்ண தொடரில் இறுதிப் போட்டி வரை முன்னேறிய அணி என்பதை கவனத்தில் கொள்ள வேண்டும். மேலும் ஐ.சி.சி தரவரிசையிலும் இலங்கை அணியானது முன்னணியில் இருந்த அணி என்பதும் முக்கியமானது. இந்த நிலையில் பாகிஸ்தான் அணியானது இலங்கை அணியை 5 போட்டிகள் கொண்ட ஒரு நாள் தொடரில் 4 போட்டிகளில் வெற்றி கொண்டு ஒரு நாள் தொடரையும் தனதாக்கியது. இந்த நிலையில் இரண்டு அணிகளுக்குமிடையில் நடைபெற்ற ஒரே ஒரு 20 - 20 போட்டியிலாவது இலங்கை அணி வெற்றி பெறும் என்றே இலங்கையணி ரசிகர்கள் எதிர்பார்த்தனர். இருப்பினும் இந்த எதிர்பார்ப்பிலும் ஏமாற்றமே மிஞ்சியது.

அதாவது இன்று நடைபெற்ற 20 - 20 போட்டியிலும் பாகிஸ்தான் அணியே வெற்றி பெற்றுள்ளது. பாகிஸ்தான் அணியைப் பொறுத்த வரையில் அந்த அணியானது 20 - 20 உலகக் கிண்ணத்தின் நடப்பு சம்பியன் என்னும் பெருமை இருந்தாலும் அண்மையில் ஐ.சி.சி அறிமுகம் செய்த 20 - 20 போட்டிகளுக்கான அணிகளின் தரவரிசைப்பட்டியலில் 7 ஆம் இடத்திலையே தரப்படுத்தப்பட்டிருந்தது. இது குறித்து பாகிஸ்தான் அணியின் தலைவர் மிஷ்பா உல் ஹஹ் உம் தனது ஆதங்கத்தை தெரிவித்திருந்ததுடன் அண்மைய போட்டிகளில் சாதிக்க தவறியமையே இந்த தரப்படுத்தலுக்கு காரணம் என்றும் சொல்லியிருந்தார். மேலும் இனி வரும் போட்டிகளில் திறைமையாக செயற்பட்டு தரவரிசையில் முன்னேறுவோம் என்றும் கூறினார். இதனை நிரூபிக்கும் விதமாக பாகிஸ்தான் அணி 20 - 20 தரவரிசையில் இரண்டாம் இடத்தில் இருந்த இலங்கையணியை 3 பந்து வீச்சுக்கள் மீதமிருக்க 5 விக்கட்டுக்களால் வெற்றி பெற்றுள்ளது.

பாகிஸ்தான் அணி பெற்ற இந்த வெற்றிகளானது பாகிஸ்தான் அணி வீரர்களின் ஒற்றுமைக்கு கிடைத்த வெற்றி என்றே சொல்ல வேண்டும். மேலும் பாகிஸ்தான் அணியின் தலைமை பொறுப்பிலிருந்தும் போட்டிகளிலிருந்தும் பயிற்சியாளருடன் இருந்த மனக் கசப்பால் ஓய்வு பெற்ற சஜிட் அப்ரிடியின் மீள் வருகையே பாகிஸ்தான் அணியின் மீள் எழுச்சிக்கும், இலங்கையணியுடனான தொடர் வெற்றிக்கும் அடிப்படையாக அமைந்தது என்று சொல்வதிலும் தவறு இருக்க வாய்ப்பில்லை. மேலும் ஒரு நாள் போட்டியில் வீரர்களுக்கான தரவரிசைப் பட்டியலிலும் இலங்கை அணியுடனான தொடரில் முத்திரை பதித்த அப்ரிடி உள்ளிட்ட வீரர்கள் கணிசமான அளவுக்கு முன்னேற்றமடைந்துள்ளார்கள். மிஷ்பா தலைமையில் அப்ரிடியின் மீள் வருகையுடன் எழுச்சி பெற்றுள்ள பாகிஸ்தான் அணியின் வெற்றி பயணம் தொடருமா? பொறுத்திருந்து பார்க்கலாம்..மேலும் இலங்கை அணியானது பாகிஸ்தான் அணியிடம் அடைந்த தோல்வியால் இலங்கை அணியின் தலைவர் TM டில்ஷானின் தலைமைத்துவம் பறி போகுமா? அப்படியானால் இலங்கை அணியின் புதிய தலைவர் தரங்கவா? மத்தியுஸா? விடைக்காக காத்திருப்போம்..

பாகிஸ்தான் அணி பற்றிய விடயங்கள் இவ்வாறு இருக்க மும்பையில் நடை பெற்று வரும் மேற்கிந்தியத் தீவுகளுக்கு எதிரான மூன்றாவது test போட்டியில் சொந்த மைதானத்தில் வைத்து தனது நூறாவது சதத்தை சச்சின் பூர்த்தி செய்வார் என்று எதிர்பார்த்த ரசிகர்களை சச்சின் 94 ஓட்டங்களுடன் ஆட்டமிழந்து ஏமாற்றியுள்ளார். இதே வேளை test இல் தனது கன்னி அரைச் சதத்தை இந்திய அணியின் விராத் கோலியும் தனது கன்னிச் சதத்தை தமிழக வீரர் ரவிச்சந்திரன் அஸ்வினும் இன்றைய தினம் பூர்த்தி செய்துள்ளார்கள். இவர்களின் இந்த சிறப்பான துடுப்பாட்டம், பந்து வீச்சு பெறுதிகள் இந்திய test அணியில் மூத்த வீரர்களான யுவராஜ்சிங், ஹர்பஜன்சிங் ஆகியோரின் இடம் தொடர்பில் சிந்திக்க செய்கிறது...

எப்போது பண்பலையில் பவனி வருவீர்கள்??-- வன்னி fm சஞ்ஜீவ ஒலி..

முயற்சி உடையார் இகழ்ச்சியடையார்.. முயன்று முயன்று முன்னேறு... முயன்று பார் முடியாது என்ற சொல்லுக்கு முற்றுப்புள்ளி வைப்பாய் இது நமது முன்னோர்களின் மொழி. எங்கள் வாழ்வில் என்றுமே கூட வரும் முது மொழிகள். இலட்சியப் பயணத்தில்தான் மனிதனுக்கு எத்தனை இடையூறுகள். அத்தனையையும் தாண்டி வெற்றியை அடைவதென்பது ஒன்றும் சாதாராண விடயம் இல்லைத்தான். உயர்ந்த அர்ப்பணிப்புடன் கூடிய முயற்சிதான் வெற்றியின் அடிப்படை.

இலங்கையின் வடக்கே முல்லைத்தீவிலிருந்து ஒரு இணைய வானொலியை ஆரம்பிக்கும் முயற்சியை கடந்த நவம்பர் மாதத்தில் ஆரம்பித்து கடந்த ஜனவரி மாதத்தில் ஒரு இணைய பக்கத்தை உருவாக்கி, அந்த இணைய பக்கத்தில் தொடர்ச்சியாக பாடல்களை ஒலிபரப்பி, கல்லூரிக் கால நண்பர்களில் பலரும் கூட வருவார்கள் என்று நம்பி ஏமார்ந்து, கடைசியில் பிந்தி வந்து இணைந்த ஒரு நட்புடன்.. அந்த நட்பின் அர்ப்பணிப்புடன் வானொலிக்கான அறிவிப்பாளர்களை தெரிவு செய்து, போதுமான பயிற்சிகளை வழங்கி, கடந்த மே 07ஆம் திகதி முல்லைத்தீவில் Vanavil Media Networks அலுவலகத்தை திறந்துவைத்து அதன் பின்னர் மே 18ஆம் திகதி நிகழ்ச்சிகளை ஆரம்பித்து.. இவையெல்லாம் நடப்பது யுத்தத்தின் கொடிய வடுக்களுடன் காட்சி தரும் முல்லைத்தீவில் என்பதுதான் இங்கு முக்கியம்.

உண்மையில் கொழும்பிலோ அல்லது வேறு ஒரு வசதிகளுடன் கூடிய இடத்திலோ இணைய வானொலியை ஆரம்பிப்பது ஒன்றும் பெரிய விடயமல்ல. ஆனால் முல்லைத்தீவில் ஆரம்பிப்பது என்பது மிகவும் சிரமமான காரியம்தான்.

நோக்கம் சிதறாமல் எடுத்த முயற்சியில் வெற்றி பெற்றோம். வெற்றி என்றால் அது சாதாரண வெற்றி அல்ல. இன்று இலங்கையிலிருந்து இணையத்தில் ஒலிபரப்பாகும் வானொலிகளில் அதிகமான நேயர்களை சென்றடையும் தமிழ் வானொலியாக வெற்றி பெற்றோம்.. மேலும் இப்போது இலங்கையிலிருந்து ஒலிபரப்பாகும் ஒரேயொரு இணையத்தள வானொலியாகவும் உள்ளோம் (பல வானொலிகள் உள்ளன ஆனால் நிகழ்ச்சிகளை படைக்கும் வானொலி என்றால் வன்னி fm சஞ்ஜீவ ஒலி மட்டுமே!)

எமது வெற்றிக்காக நாம் ஒன்றும் பணத்தையோ அல்லது பொருளையோ முதலீடு செய்யவில்லை. உண்மையை சொல்ல வேண்டுமென்றால் நாம் நமது வானொலி பற்றி வேறு எந்தவொரு ஊடகத்திலும் விளம்பரம் செய்யவில்லை. முக நூலில் உள்ள நமது நண்பர்களுக்கு மட்டுமே தெரியப்படுத்தினோம்.. நமது நண்பர்கள் தாமாக முன் வந்து தங்கள் நண்பர்களுக்கும் அந்த நண்பர்கள் தங்கள் நண்பர்களுக்கும் என்று இன்று ஏராளமானவர்கள் வன்னி fm சஞ் ஜீவ ஒலியுடன் இணைந்துள்ளார்கள்..

சஞ்ஜீவ ஒலி என்ற பெயருடன்தான் ஆரம்பித்தோம். எனினும் வன்னி என்பதை அடையாளப்படுத்தும் நோக்குடனும் ஏராளமான நேயர்களை சென்றடையும் நோக்குடனும் வன்னி fm சஞ்ஜீவ ஒலி என்ற பெயருடன் நேயர்களை சென்றடைகின்றோம். உண்மையில் நமக்கு பின்னால் எந்தவொரு அரசியல் பலமோ அல்லது நிறுவன பலமோ இல்லை. எப்பொழுதும் சுதந்திரமாகவும் சுயாதீனமாகவும் நமது நேயர்களின் விருப்பு வெறுப்புக்களை அறிந்து செயற்படுவதே வன்னி fm சஞ்ஜீவ ஒலியின் மிகப் பெரிய பலமாகும்.

எனவே இதனை கருத்திற்கொண்டு நாம் யாரிடமும் அடிபணியாத Vanavil Media Networks என்கின்ற நிறுவனத்தை அமைத்து அதன் கீழ் வன்னி fm சஞ்ஜீவ ஒலியாக உலகெங்கும் வலம் வருகின்றோம். இந்த வானொலியை ஆரம்பித்தது முதல் இன்றுவரை நம்முடன் இணைய அல்லது நம்மை விலை கொடுத்து வாங்க நினைத்து தோற்றுப்போன நிறுவனங்கள், அரசியல் சக்திகள் பல/பலர்.. (நோகாமல் நொங்கு குடிக்க நினைக்கிறாங்கப்பா.) ஆனாலும் நமது Vanavil Media Networks என்ன நோக்கத்துக்காக உருவாக்கப்பட்டதோ அதனை நாம் செவ்வனவே நிறைவேற்றுவோம், நிறைவேற்றுகிறோம்.

Vanavil Media Networks ஐ உருவாக்கியமையின் நோக்கம் ஒன்று சஞ்ஜீவ ஒலி (வன்னி fm சஞ்ஜீவ ஒலி) வானொலியை இந்த நிறுவனத்தின் கீழ் செய்வதாகும். மேலும் இன்னும் பல செயற்றிட்டங்களும் நம்மிடம் உள்ளது. முதலாவது வானொலி என்றால் இரண்டாவது மாதம் இரு முறை வெளிவரும் பல்சுவை சஞ்சிகை. அடுத்தது அழிந்து போன முல்லை மண்ணில் ஒரு பிரமாண்டமான இசைக் குழுவை அமைப்பது. இந்த வேலைத்திட்டங்களையும் இப்போது Vanavil Media Networks செயற்படுத்த ஆரம்பித்துள்ளது. இவை அனைத்தும் இன்னும் சில நாட்களுக்குள் வெற்றி பெறும் என்பதில் எந்த வித சந்தேகமும் இல்லை.

இப்போது நாம் முன்னெடுக்கும் இன்னுமொரு முயற்சிதான் முல்லைத்தீவுக்கென ஒரு தமிழ் சங்கத்தை அமைத்தல். இதற்காக கற்றோர்களையும், அறிஞர்களையும், கலைஞர்களையும் சந்தித்து அவர்களின் கருத்துக்களை உள்வாங்கி வருகின்றோம். நமது இந்த முயற்சியும் வெற்றிப்பாதையிலையே உள்ளது. இவை இவ்வாறு இருக்க நம்முடன் வன்னி fm சஞ் ஜீவ ஒலியில் இணையும் நேயர்கள் அடிக்கடி கேட்கும் ஒரு கேள்வி எப்போது பண்பலையில் வன்னி fm சஞ் ஜீவ ஒலி ஒலிபரப்பாகும்.?

இந்த கேள்விக்கும் இப்போது மெல்ல மெல்ல விடை கிடைத்துள்ளது. ஆம் மிக விரைவில் வன்னி fm சஞ்ஜீவ ஒலியை முல்லைத்தீவின் வானலைகளில் பண்பலையில் செவிமடுக்க முடியும். இதற்கான அடிப்படை வேலைகளை செய்து வருகின்றோம். விரைவில் உங்கள் மேலான அன்புடனும் ஆதரவுடனும் பண்பலையில் பவனி வருவோம்.

நாங்கள் பெறும் ஒவ்வொரு வெற்றிக்கும் சொந்தக் காரர்கள் நீங்களே.. நமது ஒவ்வொரு முயற்சியையும் எப்போதும் எங்களுடன் இணைந்துள்ள உங்கள் அன்புடனும் ஆதரவுடனும் ஆரம்பிக்கிறோம்.. பெறுகின்ற ஒவ்வொரு வெற்றிகளையும் உங்களுக்கு சமர்ப்பிக்கிறோம்... நன்றி... நன்றி... நன்றி...

சஞ்ஜீவ ஒலி ஒரு புதிய உதயம்....

நேரம் இல்லை.. நேரம் இல்லை... இதுதான் இன்று எல்லோருக்கும் இருக்கின்ற பிரச்சினை. நான் மட்டும் என்ன விதிவிலக்கா?? அதுக்காக ஐயா ஏதோ வெட்டிப் பிடுங்கிறார் என்று நினைத்தால் அது உங்கள் தப்பு. உண்மையில் வலைப் பதிவுகளை முடிந்த வரையில் ஒழுங்காக வழங்க வேண்டும் என்பதுதான் எனது விருப்பம். ஆனாலும் அவ்வப்போது ஏற்படும் சிக்கல்கள் மற்றும் மிகப்பெரிய முயற்சி ஒன்றில் ஈடுபட்டிருந்தமை போன்ற காரணங்களால் பதிவுகளை இடுவதற்கு மட்டுமல்ல மற்றையயவர்களின்பதிவுகளை வாசிப்பதற்கும் கூட நேரம் கிடைக்கவில்லை.

இவ்வாறான ஒரு சூழ் நிலையில் கடந்த செப்டம்பர் மாதத்திற்கு பிறகு இன்றுதான் எனது அடுத்த பதிவு வருகிறது. ஒரு சந்தோஷமான செய்தியை, அதாவது எனது நீண்டகால எதிர்பார்ப்பினை பூர்த்தி செய்துவிட்டு அந்த செய்தியை உங்களுடன் பகிர்ந்து மகிழ்வதற்காக இத பதிவை வரைகிறேன். எப்போதும் வானொலி, ஒலிபரப்பு என்று வாழும் எனக்கு சந்தோஷமான செய்தி என்று கோடிட்டு சொல்வதென்றால் அது நிச்சயமாக இந்தத்துறையுடன் சம்பந்தப்பட்ட ஒன்றாகத்தான் இருக்கும் என்பதை நான் சொல்லித்தான் தெரிந்துகொள்ள வேண்டும் என்ற அவசியம் இருக்காது.

சரி விடயத்துக்கு வருகிறேன். கடந்த பத்து வருடங்களாக எனக்குள் ஒரு ஆசை. அதை ஆசை என்று சொல்வதை விட எனது இலட்சியம் என்றும் சொல்லலாம். அதாவது ஒரு வானொலியை ஆரம்பிக்க வேண்டும் என்பதுதான் எனது நீண்ட நாள் இலட்சியம். இது கல்லூரியில் கல்வி கற்ற நாட்களிலையே எனக்குள் உதித்துவிட்டது. அந்தவகையில் கல்லூரியில் கல்வி கற்ற நாட்களில் கண்காட்சி நிகழ்வுகளில் நண்பர்களுடன் சேர்ந்து செய்த ஒலிபரப்புக்கள்தான் இந்த இலட்சியத்தின் அடிப்படை.

நாங்கள் கல்லூரியில் கல்விகற்றுக் கொண்டிருந்தபோது 2001 ஆம் ஆண்டு ஜூலை மாதம் 06 ஆம் திகதி "வானவில் மாணவர் ஒலிபரப்புச் சேவை" என்கின்ற பெயரில் ஒரு வானொலியை செய்தோம். எமது சூழலில் அப்போதிருந்த குறுகிய வளத்தைக் கொண்டு பண்பலையில் ஒரு குறிப்பிட்ட பிரதேசத்திற்கு எமது வானொலியை ஒலிபரப்ப முடிந்தது. வேறு எவரது உதவியும் இல்லாமால் எமது சொந்த முயற்சியில் அப்போது இளம்பராயத்திலிருந்த எங்களால் ஒரு வெற்றிகரமான வானொலியை நடாத்தி கல்லூரி சமூகத்தினதும், ஏனையவர்களினதும் பாராட்டினைப் பெற முடிந்தது அளவில்லாத மகிழ்ச்சி. அன்றுதான் நான் ஒரு வானொலி அறிவிப்பாளனாக உருவாக வேண்டுமென்று எனக்குள் இலட்சியத்தை வரித்துக் கொண்டேன்.

என்னோடு கூட இருந்த நண்பர்களும் வானொலித்துறையில் அதிக ஆர்வம்காட்டியதால் அவ்வப்போது எமது கல்லூரியிலும், ஏனைய அயல்பாடசாலைகளிலும் நடைபெறும் கண்காட்சிகளில் வானவில் ஒலிபரப்பாகத் தவறுவதில்லை. ஆரம்பத்தில் வானவில் மாணவர் ஒலிபரப்புச் சேவையாக ஆரம்பித்த நாங்கள் எமது வானொலியின் பெயரை பின்நாளில் வானவில் fm என மாற்றிக் கொண்டோம். இப்படி ஆரம்பித்த எமது பயணத்தில் கால சூழலால் பல்வேறு சோகங்கள், பிரிவுகள் நிகழ்ந்தன. அதாவது கல்லூரி வாழ்வு முடிந்ததும் நண்பர்கள் ஒவ்வொருவரும் ஒவ்வொரு திசையில் பயணிக்க நேர்ந்தது. அறிவிப்பாளனாக உருவாக வேண்டுமென்ற இலட்சியத்திலிருந்த நான் கொழும்பை நோக்கி நகர்ந்தேன். முறையான ஊடக கற்கை நெறியினைக் கற்று தாளம் fm வானொலியில் எனது அறிவுப்பு பயணத்தை ஆரம்பித்தேன். பின்னர் டான் தமிழ் ஒலியில் அறிவிப்பாளனாக பணிபுரிந்தேன்.

கல்லூரிக் கால நண்பர்களைப் பிரிந்து நீண்ட காலமாக இருந்த எனக்கு மீண்டும் நண்பர்களின் தொடர்புகள் கிடைத்தாலும் எப்போதும் எமது வானவில் fm ஒலிபரப்பில் துணையிருக்கும் சஞ்ஜீவனின் தொடர்புமட்டும் நிரந்தரமாக கிடைக்காமலே போய்விட்டது. ஆம் சஞ்ஜீவன் எங்களை விட்டு வெகுதூரம் சென்றுவிட்டான். சஞ்ஜீவன் இனி எங்களுடன் பேசமாட்டான். அவன் குரலை இனி கேட்கமுடியாது. ஆனால் உற்ற நண்பனின் நினைவுகளை அழிக்கமுடியாது. அழியாத அவன் நினைவுகளுடன் ஏனைய நண்பர்களின் தொடர்புகள் கிடைக்கவே வானொலி ஒன்றை ஆரம்பிக்க வேண்டுமென்ற எனது ஆர்வம் மீண்டும் துளிர்விட ஆரம்பித்தது.

இதன் பிரகாரம் வானவில் என்ற நாமத்தை மாற்ற முடியாத நிலையிலும் சஞ்ஜீவனின் நினைவுகளை நிலைபெறச் செய்வதற்குமாக "Vanavil Media Network " நிறுவனத்தை ஆரம்பித்து www sanjeevaoli com என்கின்ற இணையத்தளத்தினூடாக முதன் முதலாக முல்லைத்தீவிலிருந்து முழு உலகெங்கும் ஒலிபரப்பாகும் வகையில் சஞ்ஜீவ ஒலி என்கின்ற இணைய வானொலியை ஆரம்பித்துள்ளோம். எந்தவொரு பின்புலமும் இல்லாமல், எந்தவொரு அரசியல் நோக்கங்களும் இல்லாமல் முற்று முழுதாக பொழுதுபோக்கிற்காக ஆரம்பிக்கப்பட்டுள்ள ஒரு வானொலியே சஞ்ஜீவ ஒலியாகும்.

சஞ்ஜீவ ஒலி வானொலியானது எந்தவொரு தனி நபருக்கும் சொந்தமான சொத்தல்ல. இது பொதுவான ஒரு தமிழ் வானொலியாகும். "உலகெங்கும் தமிழிசை" என்கின்ற மகுடத்துடன் முல்லைத்தீவிலிருந்து முழு உலகெங்கும் இருபத்து நான்கு மணி நேரமும் ஒலிபரப்பாகும் சஞ்ஜீவ ஒலி தற்போது தொடரிசையாக பாடல்களை வழங்கிக் கொண்டிருக்கிறது. மேலும் சஞ்சீவ ஒலியின் நேரடிக் கலையாக நிகழ்ச்சிகளை ஆரம்பிக்கும் முயற்சியில் நாம் ஈடுபட்டுள்ளோம். அந்தவகையில் உலகெல்லாம் பரந்து வாழும் தமிழ் பேசும் உள்ளங்களாகிய உங்களின் மேலான ஆதரவுடன் நாம் சிகரம் தொடுவோம் என்று நம்புவதுடன், உங்கள் கருத்துக்கள், விமர்சனங்களையும் எதிர்பார்க்கின்றோம்.

உங்கள் கருத்துக்களை தற்காலிகமாக msenthuva @ yahoo com என்கின்ற மின்னஞ்சல் முகவரிக்கு அனுப்புவதுடன், 0094243246533 / 0094778092036 என்கின்ற எமது தொலைபேசி இலக்கங்கள் வாயிலாக நேரடியாக இணைந்துகொண்டும் தெரிவிக்கலாம்.

"எல்லைகள் தாண்டிய எமது பயணம் உங்களுடன்"

குறிப்பு- சஞ்ஜீவ ஒலி வானொலியினை ஆரம்பிக்கும் முயற்சியில் கூடவே இருந்து உதவிய, உதவுகின்ற நண்பர்கள், உறவுகள் அனைவருக்கும் எப்போதும் நன்றி...நன்றி...நன்றி...